عايزين تعرفوا النكد جاي منين

دايما نلاقى
الستات متهمة بأنها نكدية وهيا السبب الدائم والوحيد للنكد كأنها مولودة
وده شىء طبيعى جواها

طيب حد فكر فى يوم من الأيام النكد بيجى منين ولا
إيه أسبابه أصلا ولية الستات بس اللى متهمة بكده مع أن فيه رجالة لو بصيت
ليهم بس تحس بنكد الدنيا عليهم ولكن برضة محدش بيجى جمبهم شىء غريب

أنا هتكلم بموضوعية شديدة ومش هنحاز أبدا لبنى جنسى
وهقول أنهم كلهم ملايكة ومفيش زيهم وفعلا فعلا فيه ستات خميرة عكننة ماقلتش
أى حاجة

ولكن تيجوا نمشى واحدة واحدة ونشوف أسباب ده إيه

فى البداية مفيش واحدة بتتولد متعكننة ولا غاوية
مشاكل وبالعكس ده لو بصينا لأى أسرة لما بتتولد البنت الكل بيفرح ويقول
أنها هتبقى فاكهة البيت

عارفين معنى الكلمة دى إيه يعنى باباها وعمها وخالها
وأخوها وأى حد من العيلة موجود من جنس الرجال بيقول الكلمة دى يعنى هما
معترفين أنها مش هتبقى خميرة عكننة وأنها هتبقى السبب فى كل حاجة حلوة فى
البيت

ولكن لية بقى الواحد بيشوف مراتة أو خطيبتة كده مع
أنه مع أخته أو مامته أو أى واحدة أيا كان صلته بيها بيشوف عكس كده وياريت
كل واحد يبص بصة سريعة كده لبيته ويشوف بيقول إيه على مامته يااااااااااااه
ده مفيش زيها فى الدنيا وعلى أخته دى ست البنات وهكذااااااااااااااااااا

يعنى الكل معترف بأن الأم الأخت أى واحدة غير
الخطيبة والزوجة مفيش زيها

مااااااشى طيب إيه اللى بيخلى البنت اللى بتكون وردة
فى بيتها ومع أهلها وكل الناس تتحول لخميرة عكننة مع خطيبها أو جوزها

المشكلة من البداية أن الواحد ما بيحاولش يفهم البنت
اللى قدامه وشخصيتها عاملة أزاى وبتحب إيه وبتكره إيه ويكون عايزها زى ألة
يدخل فيها أوامر وينتظر الأجابة وبس ولكن مثلا يعرف هيا بتحب تتكلم
وتتناقش ولا لا بتحب تعمل إيه وبتكره إيه وهكذا فى كل حاجة فى حياتها

يعنى مثلا فيه واحدة بتحب الواحد يتكلم ويتناقش
معاها وكلنا بنعمل كده مع أخواتنا ولكن للأسف لما العلاقة بتتغير مش عارفة
بيحصل إيه للناس

على سبيل المثال أنا طول عمرى أنا وأخواتى أصدقاء
جدا وأسلوبنا مع بعض على طول الكلام والمناقشة وأننا نشاور بعض وناخد آراء
بعض فى كل حاجة ودول شباب يعنى زيهم زى أى واحد موجود فى الدنيا وعمرى ما
أتعودت أكون مجرد أله أخد أوامر ونواهى وبس من غير كلام ولا نقاش وهما
عمرهم ما شافوا أن ده فيا حاجة غلط ولا عيب ولا حرام

طبعا هلاقى واحد يقولى طيب أنا دلوقتى راجع من شغلى
ومخنوق وقرفان ومش معقول أول ما هدخل من باب البيت هفتح محاضرة معاها

وأنا ما قلتش كده لأن الواحدة الذكية لازم تعرف أمتى
تتكلم وأمتى تسكت وأكيد لو الأثنين فاهمين بعض قوى هيعرفوا أمتى محتاجين
يتكلموا مع بعض وأمتى لا

ما بنقولش يبقى الكلام شغال طول اليوم بس مش على طول
صمت

وبلاش حد يقول مفيش واحدة بتعرف الواحد أمتى بيحب
يتكلم وأمتى لا لأن ده أتهام مالوش داعى ولا أساس

يعنى أى واحدة فى بيت أهلها بتتعامل طول عمرها مع
باباها ومع أخواتها وأكيد كانت بتعرف هما أمتى بيحبوا يتكلموا أمتى لا
وأكيد زى ما فهمت طبيعة دول وهما رجالة هتقدر تفهم طبيعة جوزها

ولكن لو حصل بقى وأنت ما فهمتش طبيعة اللى قدامك
وكنت ماشى معاها بنظام الصمت الرهيب بالأضافة بقى الى الأوامر والنواهى
بدون نقاش الى تجاهل هيا بتحب إيه وبتكره إيه وهكذا هتنتظر منها إيه

هيا ممكن تستحمل يوم أتنين عشرة شهر أتنين على أمل
أنك تتغير ولكن تفتكر هتقدر تستحمل كده طول العمر

طيب لو أنت مكانها وهيا اللى مش فهماك ومش مراعية أى حاجة عندك كان أحساسك هيكون إيه وقتها

وطبعا موضوع الكلام والمناقشة مثال وممكن نقيس عليه
بقى كل حاجة موجودة فى حياتنا

فيه حاجة تانية برضة مهمة أن الواحدة بيبقى عليها
ضغوط وأعباء ممكن تخليها فعلا عصبية متنرفزة ولأن مسئولية البيت والأولاد
وخلافه مسئولية مش سهلة أبدا وفيه ساعات رجالة ما بتقدرش تفهم الموضوع ده
وعايز أول ما يرجع يلاقيها فى لحظة نسيت كل حاجة وكل التعب وبقت تحت أمره
!!!؟؟

هو طبعا المفروض أن الواحدة ما تقابلش جوزها بتكشيرة
ولا بالمنظر بتاع لبس المطبخ والتنضيف وهكذا وتكون غير كده ولكن كل ده مش
هيمنع أنها مثلا فى يوم تعبانة أو مضايقة ومحتاجة كلمة أو لمسة أو حتى
أبتسامة تنسيها كل ده مش تلاقى اللى قدامها بص لها بصة مش ولابد ودخل نام
مع كام كلمة أنها نكدية وغاوية مشاكل

التعامل مع
الستات بسيط جدا وفى نفس الوقت معقد

بسيط لو قدرت تفهمها وعرفت أزاى تكسبها ومعقد لو
تجاهلت أنها أنسان وساعات كتير بتبقى زى الطفل محتاجة حاجات بسيطة قوى أبسط
مما تتخيل وهتشوفها أحلى واحدة فى الدنيا

يعنى لما تبقى محتاجة لمسة حنينة منك
وما تلاقيهاش !!

لما تبقى محتاجة كلمة حلوة وما تسمعهاش
!!

لما تبقى محتاجة صديق وما تلاقيهوش !!
لما تبقى محتاجة حضن حنين وما تحسوش !!

لما تبقى محتاجة كلمة تشجيع على أى
حاجة بتعملها وما تلاقيش غير صمت أو سخرية من اللى بتعمله !!

لما تبقى محتاجة مجرد وردة واحدة هدية
منك وما تشوفهاش !!

لما تبقى محتاجة رسالة حب على تليفونها
ومش شرط وأنت فى مكان بعيد عنها ده ممكن حتى وأنتوا فى نفس البيت ولكن لما
ما تلاقيش لا ده ولا ده !!
لما تبقى محتاجة مليون حاجة وحاجة وما تلاقيش ولا
حاجة تفتكر هتبقى مبسوطة ولا متنكدة

عرفتوا بقى النكد بيجى منين بيجى لما كل طرف
ما يحاولش يفهم الطرف التانى وكلامى مش بس للرجالة ده للبنات كمان ولأن لو
الأتنين فهموا بعض كويس وما شافوش أنهم داخلين حرب وكل واحد فيهم عايز
ينتصر ومجهز أسلحته وعايز يمشى الكون بمزاجه ويغير فى التانى ويعمل ويسوى
الدنيا هتتغير شوية وهنلاقى النكد سواء اللى فى الستات أو الرجالة أختفى
ومابقاش موجود لأننا أحنا اللى بنصنعه بمزاجنا وبأرادتنا ونرجع نشتكى بعد
كده

تسلم ايدك يا فاطمة موضوع جميل والله بس مين اللى بيعمل كده اليومين دول اكتر الناس بتقول يلا نفسى بس مش كل الناس بتقول كده

مرسيييييي كثيررررررر عنجد صح والللللللله تسلم يدك احنا بنات مش وحشات زي مبيتخيلوا الرجاله ولا هما هيك بس لازم كل واحد يتنازل شويا وكل واحد يحس بتاني عشان نعيش حياة حلوا وبصرااح انا وحده بنكد كثير بس مش بايدي حاولت اغير من حالي في اصاحب الي بيقولوا اني بتغير وبصراحه فاطمة في شخص خايفه اخصره يمكن من كلامك احاول واجتهد اكثر عشان اتغير مرسي مره ثانيه[/b]

تسلم إيدك يا نور الشمس بجد موضوع متميز جدا

بس هو الواحد ممكن يتنازل عن حاجات كتير مع مراته عشان الحياة تمشي وميمسكلهاش ع الواحدة عشان لو عمل كدة يبقي هيطلع عليها في اليوم مئات الأخطاء لأن الحريم أصلا أخطاؤهم كتيرة ، فالواحد المفروض يسامح مراته في اليوم عن 70 خطأ لكن بقى لو زادت يسامحها برضة لأن المرأة دي نصف المجتمع فمش لازم نزعلها .
وبرضة الرجالة بتخطأ كتير وأبسط شئ لما بيحصل مشكلة مع الزوجة وحماتها غالبا تلاقي الرجل إما أن يقول لزوجته بعنف ( هي حرة ، تعمل اللي هي عايزاة ، دي أمي دي كل حاجة في الدنيا ، إياكي أعرف إنك زعلتيها ، وربما يضربها ) وإما أن يتخانق مع والدته بسبب زوجته ودا طبعا لأنه مش عارف يسايس الأمور والرجل اللي بيعمل كدة غالبا بيكون عصبي ومش بيحاول يتفاهم مع حد
ف اللي زي دة لازم الواحدة تصبر عليه وتستحمله وتتنازل عن أي شئ في سبيل إسعادة لأنه ممكن في لحظة غضب يقول لها باي باي ( إنتي طالق ) .

في حاجة أخيرة بقي عايز أعلق عليها :
الواحد طبعا مش هيعيش طول عمرة رومانسي ويديها ورد ويبعتلها رسايل ع الموبايل والكلام الفاضي ده ، الكلام ده كان ممكن وقت الخطوبه وكفايه عليها كده إحنا هنقضيها رومانسيه ، الرومانسية دي بتكون فترة الخطوبه وبعد الجواز بشوية غير كده لا خلاص بقي

تسلم ايدك

بجد نايس توبيك يا قمر

الرومانسى الخزين
الماجيك
يحيى

» كلمات البوم امال ماهر اعرف منين 2011